(खासगी आस्थापनांतील मतदारांना मतदानासाठी दोन तासांची विशेष सवलत)
पुणे :
पुणे विभागातील पदवीधर व शिक्षक मतदारसंघाच्या द्विवार्षिक निवडणुकीचा कार्यक्रम जाहीर झाला असून, निवडणुकीत मतदार असलेल्या पदवीधर व शिक्षकांना मतदानाचा हक्क बजावता यावा, यासाठी शुक्रवार, २३ ऑक्टोबर २०२६ रोजी भरपगारी सुट्टी जाहीर करण्यात आली आहे.
सामान्य प्रशासन विभागाच्या निर्णयानुसार ही सुट्टी लागू करण्यात आली असून, लोकप्रतिनिधित्व अधिनियम, १९५१ मधील कलम १३५-ब नुसार संबंधित मतदारांना मतदानाचा हक्क बजावता यावा, यासाठी हा निर्णय घेण्यात आला आहे.
या निर्णयामुळे निवडणुकीच्या दिवशी मतदार असलेल्या पदवीधर व शिक्षकांना मतदानासाठी कामाच्या ठिकाणी अडथळा येणार नाही. खासगी आस्थापनांमध्ये कार्यरत असलेल्या पदवीधर व शिक्षक मतदारांनाही मतदानासाठी दोन तासांची विशेष सवलत देण्यात यावी, असे निर्देश देण्यात आले आहेत.
पुणे विभागाच्या विभागीय आयुक्त तथा निवडणूक निर्णय अधिकारी शीतल तेली-उगले यांनी याबाबत माहिती दिली आहे. मतदानाची टक्केवारी वाढविण्यासोबतच प्रत्येक पात्र मतदाराला आपला मतदानाचा हक्क बजावता यावा, या उद्देशाने प्रशासनाकडून हा निर्णय घेण्यात आला आहे.
मतदारांना मतदानासाठी आवश्यक सुविधा देणे ही संबंधित आस्थापना व कार्यालयांची जबाबदारी असून, निवडणूक प्रक्रिया सुरळीत पार पाडण्यासाठी सर्वांनी सहकार्य करावे, असे आवाहन प्रशासनाने केले आहे.
