ज्येष्ठ अभिनेत्री मधू कांबीकर यांचे वयाच्या ७३ व्या वर्षी निधन : पुण्यात घेतला अखेरचा श्वास; मराठी चित्रपटसृष्टी, रंगभूमी आणि लोककलेच्या क्षेत्रात शोककळा
पुणे : मराठी चित्रपटसृष्टी, रंगभूमी आणि लोककलेच्या क्षेत्रात आपल्या अभिनयाचा आणि लावणीच्या अदाकारीचा ठसा उमटविणाऱ्या ज्येष्ठ अभिनेत्री व प्रसिद्ध लावणी कलावंत मधू कांबीकर यांचे सोमवारी (१२ ऑक्टोबर) पुण्यात निधन झाले. त्या ७३ वर्षांच्या होत्या. गेल्या काही वर्षांपासून त्या दीर्घ आजाराने त्रस्त होत्या. त्यांच्या निधनाने मराठी कलाविश्वातील एक बहुआयामी व्यक्तिमत्त्व काळाच्या पडद्याआड गेले आहे.
तमाशाच्या फडातून त्यांनी आपल्या कलाप्रवासाला सुरुवात केली. लोककलेच्या मुशीत घडलेल्या कांबीकर यांनी पुढे मराठी चित्रपट, लोकनाट्य, व्यावसायिक रंगभूमी आणि दूरदर्शन या विविध माध्यमांतून आपल्या अभिनयाची छाप पाडली. अस्सल ग्रामीण ढंग, सहजसुंदर अभिनय आणि लावणी सादर करण्याची स्वतंत्र शैली ही त्यांची वैशिष्ट्ये होती.
ज्येष्ठ दिग्दर्शक राजदत्त यांच्या ‘शापित’ या चित्रपटातील भूमिकेमुळे त्यांच्या अभिनयाची विशेष दखल घेतली गेली. ‘हेच माझं माहेर’, ‘राघुमैना’, ‘एक होता विदूषक’, ‘झपाटलेला’, ‘डेबू’ आणि ‘येऊ का घरात’ यांसारख्या चित्रपटांतील त्यांच्या भूमिका प्रेक्षकांच्या स्मरणात राहिल्या. विशेषतः आई आणि सासू अशा विविध व्यक्तिरेखांमधून त्यांनी आपल्या अभिनयातील सहजता आणि वेगळेपण सिद्ध केले.
लावणीच्या पारंपरिक बाजाचे जतन करताना त्यांनी लोककलेला व्यापक प्रेक्षकवर्ग मिळवून देण्यात महत्त्वाची भूमिका बजावली. अभिनय आणि नृत्य यांचा सुरेख संगम साधत त्यांनी अनेक दशके मराठी मनोरंजनविश्व समृद्ध केले.
मधू कांबीकर यांच्या निधनाने मराठी चित्रपटसृष्टीने एक गुणी अभिनेत्री, तर लोककलेने लावणीच्या परंपरेशी निष्ठा राखणारी ज्येष्ठ कलावंत गमावली आहे. त्यांच्या निधनाने चित्रपट, नाट्य आणि लोककला क्षेत्रातून हळहळ व्यक्त होत आहे.
